L’emprima emna tar GRdigital: Il start da Flurina en il mund dal futur digital!

In cordial bainvegni

Acceptar ina nova sfida è adina excitant – spezialmain, sch’ins vegn retschavì uschè avert e cordial sco jau tar GRdigital! Gia cura che jau sun entrada en noss spazi da co-working tar Flex Desk en la Bahnhofstrasse a Cuira, hai jau immediat gì ina buna sensaziun. Ils uffizis moderns ed averts, la stanza da pausa cunvegnenta ed ils locals da sesidas bain endrizzads dattan ina atmosfera da lavur fantastica.

In grond engraziament va a Marcel, che m’ha surpraisa cun in stupent pachet da bainvegni: ina carta da GOOD VIBES, ina buttiglia d’aua stilusa ed ina generusa purziun da Celebrations. Po in start esser meglier? I doubt it!

S’endrizzar, s’integrar ed emprimas incaricas

Il prim di era deditgà surtut a l’installaziun: programs, tools e chanals da communicaziun èn vegnids installads per che jau possia cumenzar senza retard. Suenter in delizius gentar en il NoName a Cuira, hai jau survegnì emprims sguard en mes pensums.

A partir da mardi è ì per propi! Jau hai prendì part a mes emprims termins – tranter auter ad in barat inspirant davart «VR of the Future» tar skipp communications AG a Cuira. Nus avain discutà davart la digitalisaziun e la rolla dals cussegls administrativs en il chantun – ina discussiun inspiranta che m’ha procurà spiras novas e preziusas.

Mesemna era il program d’approfundar mes proxims pensums. Jau m’hai intensivamain fatschentà cun las dumondas da project – in sectur central da GRdigital, che m’ha dà ina emprima impressiun co che nus sustegnain e promovain projects digitals en il chantun.

Gievgia ha cumenzà cun ulteriuras sesidas ed accords, nua che jau hai gì la schanza da m’integrar anc meglier en ils process da GRdigital. Il suentermezdi hai jau gì liber, perquai che jau lavur cun in pensum da 90%.

Venderdi ha entschet cun in inscunter per in proxim workshop, nua che nus avain finalisà la preschentaziun e definì ils proxims pass. Durant noss Jour fixe hai jau emprendì co che nus coordinain projects e tge accents che vegnan mess durant las proximas emnas. Jau hai chattà spezialmain interessant il barat davart ils proxims eveniments – ina part nua che jau vi contribuir activamain en il futur.

E lura è gia stà il mument da scriver quest post da blog – la finiziun perfetta da mia emprima emna!

In start promettent

Mia emprima emna tar GRdigital è passada sco in sigl! Jau sun vegnida recepida cordialmain, hai pudì rimnar bleras impressiuns interessantas e ma legrel sin las novas sfidas che vegnan. Activamain furmar la transformaziun digitala en il Grischun è ina gronda schanza, ed jau ma legrel da lavurar cun il team vi da projects captivants.

Ans mettain ensemen a l’ovra!

Flurina Jäger, collavuratura da project graubünden digital