Dumondas
Ils daners da promoziun dal Chantun vegnan impundids per accelerar la transfurmaziun digitala en il Grischun. Mintga persuna e mintga organisaziun po far ina dumonda da promoziun per in project, sche quel è avantagius per l’economia publica grischuna e betg mo per in singul manaschi. Qua chattas ti tut las infurmaziuns ed ils documents necessaris per inoltrar ina dumonda.
Co funcziuna il proceder da dumondas?
La dumonda è d’inoltrar a GRdigital. Il secretariat examinescha, sch’ella è cumpletta ed ademplescha ils criteris formals. Silsuenter evalueschan expertas ed experts il project e fan ensemen cun la suprastanza ina recumandaziun da promoziun per mauns da la Regenza. Quella decida, sch’ella accepta la recumandaziun e communitgescha il resultat a la persuna u a l’organisaziun che ha inoltrà il project.
En la fasa da realisaziun vegn controllà a maun dals terms impurtants, sch’il project è sin buna via da cuntanscher las finamiras determinadas. Durant l’entir proceder stat il secretariat da GRdigital a disposiziun per dumondas e sustegn.
