Contribuziun chantunala per ina plattafurma da trenament virtuala per il persunal medicinal spezialisà a l’Ospital chantunal dal Grischun

Il project ha la finamira da manar tras en l’avegnir las scolaziuns per tgirunzas e tgirunzs cun agid da la realitad virtuala. Uschia duai esser pussaivel da distgargiar las persunas spezialisadas qualifitgadas d’incumbensas da scolaziun, da flexibilisar ils temps da scolaziun sco er da simplifitgar l’introducziun da novas collavuraturas e collavuraturs. La finala vegnan spetgads in augment considerabel da l’effizienza, ina distgargia da las tgirunzas e dals tgirunzs ed in augment da la qualitad dal provediment da tgira e da la segirezza da las pazientas e dals pazients.

«PixrealitiesTM» è ina soluziun da plattafurma virtuala da la firma Pixelmolkerei SA da Cuira, ch’è sa spezialisada sin trenaments virtuals, independents dal lieu e dal temp, per il persunal medicinal spezialisà. La firma transfurma il cuntegn da scolaziun en ina furma virtuala. Al letg da tgira virtual emprendan las tgirunzas ed ils tgirunzs cun agid d’egliers da video che als mainan en moda automatisada tras il program da scolaziun. La scolaziun duai esser concepida en moda interactiva, per che las collavuraturas ed ils collavuraturs possian gidar a reflectar activamain ed internalisar las acziuns ed ils moviments correspundents.

Ulteriuras infurmaziuns

Contact per dumondas da consultaziun:

Marcel Meyer

Manader da fatschenta GRdigital
T +41 81 250 69 11
marcel@grdigital.digital