Start da Rebeccas tar GRdigital

Allegra

Jau sun Rebecca, hai 30 onns e sun oriunda da Winterthur. Ma mia amur per il chantun Grischun ha cumenzà gia avant da lung temp. Gia d’uffant passentava jau adina mes congedi da stad u d’enviern a Lai, ed avant passa 2 onns hai jau decis d’ir a star en il Grischun. Mes nov domicil è ussa a Falera. En mes temp liber m’entaup jau gugent cun amis, emprendesch d’enconuscher la natira, d’ir cun velo, d’ir a viandar, da raiver u da star sin ils skis. Mes amis dal “Unterland” ma visitan gugent, per els ma sent’i qua sco vacanzas. Ed ussa lavur jau là, nua che auters fan vacanzas.

Partenza tar GRdigital

L’avrigl 2023 hai jau cumenzà mia nova sfida sco manadra da project Digitalisaziun tar il secretariat da GRdigital. Ensemen cun Marcel surpigliain nus incumbensas operativas en il secretariat ed essan il post central da consultaziun e da coordinaziun per temas da la transfurmaziun digitala. Mia carriera professiunala d’enfin ussa hai jau passentà tar Raiffeisen ed hai gì la schanza da viver cun intginas midadas internas. Il tema transfurmaziun digitala ha giugà era là ina gronda rolla. La digitalisaziun è in tema fitg discutà che m’interessa era ed jau m’allegrel da pudair realisar ussa en la pratica quai che jau hai emprendì cun mes MAS Digital Marketing terminà cun success. Grazia che jau dastg esser ina part da GRdigital.

Emprima retrospectiva

Gugent guard jau enavos sin mes emprims mais tar GRdigital e vuless gidar vinavant cun cumplain engaschament a purtar enavant il chantun Grischun en il sectur da la transfurmaziun digitala. Ils emprims dus mais hai jau fatg enconuschientscha cun la suprastanza da GRdigital e gia hai manà intgins discurs cun differentas persunas sco persunas petentas ed interessents. Ils contacts eran tant virtuals sco era persunals. Jau hai gì grond plaschair da m’inscuntrar persunalmain a chaschun da la segunda radunanza generala regulara da commembras e commembers da GRdigital, persunas spezialisadas* ed ulteriuras persunas interessadas. Jau chat grondius che jau poss avair tants contacts e m’inscuntrar cun persunalitads da differents champs spezials e ma barattar cun ellas. Tar la participaziun al Digital Summit a Vaduz hai jau plinavant gì la pussaivladad da tadlar experts e represchentants da la branscha che han discurrì co che svilups actuals sco il computer dals quantums, l’intelligenza artifiziala u il metaverse midan l’economia. Era differents utensils han saviu vegnir testai sco per exempel ils egliers da VR.

Ultra da quai ma legrel jau sin la collavuraziun cun Marcel en il secretariat e sin blers auters inscunters captivants e discurs cun la suprastanza, cun cussegliaders spezialisads*, cun commembers, cun petents, cun il chantun e cun auters interessads. Mia finamira è da contribuir a la promoziun da la transfurmaziun digitala en il chantun Grischun ed augmentar uschia la cumpetitivitad, la valur agiuntada e la forza innovativa dal lieu economic.

Ensemen pudain nus prender per mauns la transfurmaziun digitala – pia ir!