«La tecnologia ha il potenzial da tant integrar sco era excluir.»

Datti in sectur che vus considerais spezialmain exemplaric?

Josy Battaglia: «Jau na pens betg ch’i dettia branschas che resguardan pli fitg il tema da l’integraziun digitala da persunas cun impediments. Qua e là datti buns exempels. La digitalisaziun porscha dentant in grond potenzial per l’inclusiun, spezialmain per las persunas pli flaivlas en nossa societad. Jau sun da l’avis che mintgin da nus duess pensar en ses sectur, tge avantatgs che nus avessan, sch’era persunas cun impediments pudessan acceder a tecnologias d’infurmaziun e communicaziun.»

Tge èn las pli grondas sfidas tar l’integraziun da persunas cun impediments en il mund digital?

Selina Liver: «La tecnologia po inclusiv sco exclusiv. Mancanzas en la cumpetenza da medias pon manar a dischavantatgs socials. Persunas cun impediments èn savens dischavantagiadas gia da principi, perquai ch’ellas han magari betg ils meds finanzials per permetter ellas apparats digitals. Ultra da quai mancan savens las cumpetenzas da medias necessarias per profitar dals avantatgs che purschidas digitalas porschan. E tuttina na correspundan questas purschidas savens betg als basegns da tut las persunas. La varietad da persunas cun impediments e lur basegns en connex cun tecnologias digitalas pretendan purschidas flexiblas ed adattadas. Plinavant stuess er vegnir promovida ina tenuta pli positiva da socialassistentas e socialassistents envers la tecnologia, perquai che quella è savens resguardada cun sceptica.»

Tge stuessan projectaders e sviluppaders d’in project digital resguardar?

Selina Liver: «En l’entschatta è necessari da definir in concept sco basa per la realisaziun da la purschida da medias e per definir tge tecnologias d’infurmaziun e communicaziun (TIC) vegnan applitgadas en l’instituziun tecnica. Quests princips fixeschan la tenuta da l’instituziun envers l’utilisaziun da TIC tras ils utilisaders. Qua duain vegnir illustrads il champ d’acziun e las tematicas prioritarias pussaivlas sco er purschidas concretas e lur realisaziun. Per quest lavur è impurtant da crear ina basa legala per l’utilisaziun da TIC en l’instituziun (per exempel las prescripziuns da model sviluppadas da INSOS). Suenter duain il concept ed il reglament vegnir preschentads a las famiglias ed als represchentants legals per infurmar. Lura èsi impurtant da metter a disposiziun als utilisaders meds e resursas digitalas, cun sustegn d’in persunal scolà che po gidar tar l’exploraziun digitala. Per questa lavur vegnan er pretendidas spezialists en il champ da savida tecnica. E finalmain duvrain nus meds finanzials ed ina clera decisiun per far tut quai pussaivel.»

Tge fas vus e/u il chantun Grischun per promover questa integraziun?

Josy Battaglia: «Concret avain nus sco instituziun decidì d’investir temp, daners e persunal en la promoziun da questa proposta e purschida da furmaziun per ils utilisaders dal servetsch da sustegn. Nus avain concludì che quest project ha prioritad avant auters projects che na vegnan betg finanziads directamain entaifer il mandadi da prestaziun dal chantun, mabain savens tras meds e donaziuns da persunas privatas. Il chantun Grischun è stà l’emprim che ha acceptà nossa iniziativa, e nus sperain ch’el cuntinueschia, suenter ch’el è vegnì infurmà davart ils resultats dal project, a sustegnair nossas ponderaziuns entaifer projects remartgablas, en connex cun la Convegna da l’ONU davart ils dretgs da persunas cun impediments (UNO-BRK). Nus sperain ch’el garanteschia vinavant sia sustegnanza, magari cun promoziuns specificas e sustegn da projects innovativs.»

Simplifitgeschan ils agids digitals la vita da persunas cun impediments u fan els pli cumplitgada?

Selina Liver: «La digitalisaziun da nossa societad è ina sfida per tuts, cun schanzas e ristgs. Tuttina furma ella ozendi ina part fixa da la societad. La promoziun da l’inclusiun da persunas cun impediments, sco ella vegn definìa er en la CDPD, è betg concepibla senza la promoziun da cumpetenzas da medias en la lavur socialpedagogica. Medias digitalas pon augmentar l’independenza da persunas cun impediments, sustegnair novas dimensiuns da communicaziun u schizunt render quellas pussiblas. Agids digitals porschan pia la pussaivladad da surmuntar barrieras e da permetter ina participaziun inclusiva en la societad dad oz. Sch’igl è pli betg pussibel da desister dad agids digitals, stuain nus promover la cumpetenza da medias da persunas cun impediments, dar ad els ils meds e la savida necessaria per utilisar quels segiramain e far uschia er la prevenziun necessaria.»

Tge stuess, tenor Vossa opiniun, anc vegnir fatg per promover l’integraziun?

Selina Liver: «L’interess e la curiositad che las tecnologias digitalas dad oz sveglian en mintgin da nus porschan in grond potenzial per la lavur socialpedagogica. En quest senn stuess la purschida vegnir extendida. Per che persunas cun impediments possian profitar da tecnologias digitalas en la medema maniera, stuessan quellas esser accessiblas per tuts. Websites senza barrieras cun in linguatg simpel, cuntegns clers e scrittira legibla, designs simpels cun maletgs e multimedia (vesair per exempel simplinavigar.ch). En curt: nus stuain sensibilisar la societad cuntinuadamain davart las pussaivladads da TIC per persunas cun impediments. Nus stuain promover la furmaziun per meglierar las cumpetenzas da medias da persunas cun impediments. Projects sco noss stuessan vegnir rendids visibels, tant sin plattafurmas per lavur sociala sco er sin quellas dedicadas al mund digital.»

Davart MOVIMENTO Poschiavo

MOVIMENTO Poschiavo è in’instituziun che tgira ils basegns ed interess da radund 50 persunas cun impediments psichics, spiertals (animeschs) e corporals che vivan en il Valposchiavo. La purschida per l’integraziun professiunala e d’abitar vegn garantida tras la tgira da radund 20 collavuraturs.

Selina Liver (Bachelor en pedagogia clinica e sociala da la UNIFRI) è dapi avust 2019 lavuranta sociala en l’atelier protegì ed impiegada en il departament pedagogic da MOVIMENTO Poschiavo.

Josy Battaglia (Bachelor en lavur sociala da la SUPSI) è dapi october 2014 manadra da MOVIMENTO Poschiavo.

Ulteriuras infurmaziuns davart las activitads da MOVIMENTO Poschiavo

Pagina-web da MOVIMENTO
Video dad RSI
Programma da Rete Uno
Artitgel da swissinfo.ch