FAQ

Ein Mann bei Vermessungsarbeiten an einem zugefrorenen Stausee in winterlicher Landschaft in Graubünden

Qua chattas ti in catalog da dumondas e respostas cumplessiv per inoltrar ina dumonda da promoziun.

Dumondas generalas

1. Tge geners da projects promova GRdigital?	Degns da vegnir promovids èn projects che favuriseschan tut en tut l’ economia publica dal chantun Grischun. Detagls en quest connex chattais Vus en il model directiv da promoziun. GRdigital divida ils projects en trais geners tenor l’ effect che vegn prendì en mira: projects exemplarics cun in grond effect ed ina vasta irradiaziun sur ils cunfins chantunals projects cumplessivs cun ina buna relaziun tranter custs e niz e cun in effect da multiplicatur projects da pilot e projects pitschens sco era preprojects per sviluppar projects pronts per la realisaziunTut tenor il gener da project duvrain nus autras indicaziuns da Vus. Ils criteris d’evaluaziun vegnan applitgads tenor il gener da project ed a basa da las lingias directivas. Per evaluar projects pli gronds èn necessarias ulteriuras infurmaziuns.Per cumplettar l’offerta planisescha GRdigital da publitgar anc auters geners da project e champs tematics.
2. Tgi decida da tge gener da project ch'i sa tracta?	Dumondas cun ina summa da promoziun da passa CHF 500’000 tracta GRdigital da princip sco projects exemplarics. L’autezza da la summa da promoziun dumandada serva sco referiment per definir il gener da project. Vus pudais decider, sche Vus vulais inoltrar in project exemplaric, in project cumplessiv u in project da pilot resp. in project pitschen/preproject. Il secretariat As stat gugent a disposiziun per cussegliaziuns en connex cun il gener da project. El s’annunzia era tar Vus, sch’i dat dubis en connex cun questa classificaziun.
3. Tge projects na po GRdigital betg promover?	Mesiras da marketing exclusivas; Projects d’infrastructura sco p.ex. l’access cun bindel ultralad ed investiziuns exclusivas en hardware; Projects en il sectur da la digitalisaziun senza in cler connex cun la transfurmaziun digitala tenor l’art. 3 al. 1 OTD (p.ex. projects en il sectur dal web ed en las medias socialas senza connex cun la transfurmaziun digitala); Projects ch’èn gia terminads il mument che la dumonda vegn inoltrada; Projects che cuntinueschan activitads existentas senza porscher innovaziuns u scalaziuns Projects che cuntrafan a las lingias directivas da GRdigital;
4. Tgeninas èn las basas per evaluar ils projects e co èn ellas vegnidas determinadas?	Decisivas èn las finamiras da promoziun determinadas en la Lescha e l’Ordinaziun davart la promoziun da la transfurmaziun digitala en il Grischun. Las lingias directivas da GRdigital èn vegnidas elavuradas a basa da questas prescripziuns legalas. A basa da las lingias directivas, dals concepts gia elavurads e da la pratica d’evaluaziun da projects d’autras instituziuns en ed ordaifer il Grischun avain nus elavurà criteris d’evaluaziun specifics (criteris da promoziun). Quests criteris d’evaluaziun èn la basa per examinar las dumondas. La suprastanza da GRdigital e la Regenza dal chantun Grischun han approvà las lingias directivas ed ils criteris d’evaluaziun. Il document «Indicaziuns davart il cuntegn dal project» cuntegna ils criteris d’evaluaziun. Tenor las lingias directivas da promoziun vegn applitgà in auter dumber da criteris tut tenor la grondezza ed il gener da project. Per quest motiv datti per mintgin dals trais geners da project in agen model cun ils criteris d’evaluaziun correspundents. Qua chattas ti las premissas per la promoziun d’in project, documents da model ed ils criteris, tenor ils quals il project vegn evaluà.
5. Poss jau preschentar persunalmain mia dumonda al cussegl spezialisà?	Avant che evaluar la dumonda dain nus a las petentas ed als petents la pussaivladad da preschentar il project en il rom d’in live-pitch. La preschentaziun cun runda da dumondas d’expertas e d’experts va maximalmain 15 minutas ed ha lieu sulettamain online. Las expertas ed ils experts restan anonims. Il termin dal live-pitch vegn communitgà a las petentas ed als petents suenter ch’els han inoltrà lur project.
6. Tgi po inoltrar ina dumonda?	Tenor l’art. 3 al. 1 a) LTD pon interpresas, uniuns, organisaziuns ed instituziuns da dretg public inoltrar dumondas. Per societads simplas sto in’organisaziun giuridica esser la purtadra dal project. Dumondas da manaschis singuls pon mo vegnir resguardadas, sche la neutralitad areguard la concurrenza na vegn betg violada ed ils purtaders han la sedia en il Grischun. Ulteriuras infurmaziuns èn da chattar en il document «Indicaziuns davart il cuntegn dal project».
7. Ston ins esser commembra/commember da GRdigtal per pudair inoltrar ina dumonda?	Na, in commembradi da GRdigital n’è betg necessari per pudair inoltrar ina dumonda.
8. Nua pudais Vus inoltrar la dumonda?	Vossa dumonda ensemen cun ils documents necessaris pudais Vus inoltrar cun agid dal formular disponibel sin www.grdigital.digital. Actualmain n’èsi deplorablamain betg pussaivel da memorisar il formular da dumonda en l’arcun intermediar. Perquai recumandain nus d’emplenir e d’inoltrar il formular online pir cura che tut ils documents necessaris èn pronts.
9. Pertge dovra GRdigital in'autra documentaziun tut tenor il gener da project?	Nossa incumbensa èsi d’elavurar Vossa dumonda a moda speditiva e cumpetenta. L’emprim evaluain nus la dumonda formalmain, quai vul dir che nus examinain, sch’ella è cumpletta ed ademplescha las premissas. Silsuenter evaluain nus il cuntegn dal project a maun dals criteris da promoziun. Per far questa evaluaziun duvrain nus tut tenor il gener da project autras infurmaziuns ed indicaziuns. Per tut ils projects èsi necessari d’inoltrar infurmaziuns da basa cun agid dal formular online (survista dal project), ultra da quai èsi d’emplenir il document «Indicaziuns davart il cuntegn dal project» – tut tenor il gener da project cun dapli u damain infurmaziuns. Era la dimensiun da las agiuntas necessarias variescha tut tenor, sch’i sa tracta da projects pli gronds, projects pitschens u projects da pilot. Las agiuntas pon era vegnir reunidas en in document cumplessiv.
10. Nua chat jau sustegn per sviluppar projects ed inoltrar dumondas?	Il secretariat da GRdigital stat a disposiziun a tut las persunas che vulan iniziar, inoltrar u purtar in project da digitalisaziun. El cusseglia en connex cun il svilup da projects pronts per la realisaziun e porscha sustegn cun l’inoltraziun da dumondas. Contact

Dumondas tar tips da projects

11. Tge documents èn necessaris per inoltrar in project exemplaric?	Per inoltrar in project exemplaric stuais Vus metter a disposiziun ils suandants documents, per che nus possian elavurar Vossa dumonda a moda speditiva e fundada: La survista dal project tenor il formular d’inoltraziun sin la pagina-web da GRdigital Il model «Indicaziuns davart il cuntegn dal project» Ultra da quai supplitgain nus d’ans metter a disposiziun las suandantas infurmaziuns (gugent pudais Vus reunir tut las agiuntas en in document): Agiunta 1: plan da temp e da project cun ils terms impurtants (per detagls guardar la dumonda 11) Agiunta 2: indicaziuns davart l’organisaziun ed ils acturs involvids (organisaziun dal project/organigram cun incumbensas e repartiziun da las rollas; cumprova da las cumpetenzas dals purtaders dal project /da la direcziun dal project/da las collavuraturas e dals collavuraturs impurtants dal project (per detagls guardar la dumonda 15) Agiunta 3: budget e plan da finanziaziun (per detagls guardar la dumonda 16) Per projects exemplarics èsi d’agiuntar er in plan da business per la finanziaziun suenter la fin dal project Per pudair evaluar las atgnas prestaziuns e fixar la contribuziun èsi necessari d’infurmar davart l’engaschi d’ulteriuras persunas participadas al project, eventualas contribuziuns gia approvadas da partenaris, d’autras instituziuns da promoziun, etc. resp. d’inditgar tge instituziuns che Vus avais dumandà per ulteriuras contribuziuns da promoziun che n’èn anc betg vegnidas approvadas.
12. Tge documents èn necessaris per inoltrar in project cumplessiv?	Per inoltrar in project cumplessiv stuais Vus metter a disposiziun ils suandants documents, per che nus possian elavurar Vossa dumonda a moda speditiva e fundada: La survista dal project tenor il formular d’inoltraziun sin la pagina-web da GRdigital Il model «Indicaziuns davart il cuntegn dal project» Ultra da quai supplitgain nus d’ans metter a disposiziun las suandantas infurmaziuns (gugent pudais Vus reunir tut las agiuntas en in document): Agiunta 1: plan da temp e da project cun ils terms impurtants (per detagls guardar la dumonda 14) Agiunta 2: indicaziuns davart l’organisaziun ed ils acturs involvids (organisaziun dal project/organigram cun incumbensas e repartiziun da las rollas; cumprova da las cumpetenzas dals purtaders dal project /da la direcziun dal project/da las collavuraturas e dals collavuraturs impurtants dal project (per detagls guardar la dumonda 15) Agiunta 3: budget e plan da finanziaziun (per detagls guardar la dumonda 16) Per pudair evaluar las atgnas prestaziuns e fixar la contribuziun èsi necessari d’infurmar davart l’engaschi d’ulteriuras persunas participadas al project, eventualas contribuziuns gia approvadas da partenaris, d’autras instituziuns da promoziun, etc. resp. d’inditgar tge l’instituziuns che Vus avais dumandà per ulteriuras contribuziuns da promoziun che n’èn anc betg vegnidas approvadas.
13. Tge documents èn necessaris per inoltrar in project da pilot u in project pitschen resp. in preproject?	Per inoltrar in project cumplessiv stuais Vus metter a disposiziun ils suandants documents per che nus possian elavurar Vossa dumonda a moda speditiva e fundada: La survista dal project tenor il formular d’inoltraziun sin la pagina-web da GRdigital Il model «Indicaziuns davart il cuntegn dal project» Ultra da quai supplitgain nus d’ans metter a disposiziun las suandantas infurmaziuns (gugent pudais Vus reunir tut las agiuntas en in document): Agiunta 1: plan da temp e da project cun ils terms impurtants (per detagls guardar la dumonda 14) Agiunta 2: indicaziuns davart l’organisaziun ed ils acturs involvids (organisaziun dal project/organigram cun incumbensas e repartiziun da las rollas; cumprova da las cumpetenzas dals purtaders dal project /da la direcziun dal project/da las collavuraturas e dals collavuraturs impurtants dal project (per detagls guardar la dumonda 15) Agiunta 3: budget e plan da finanziaziun (per detagls guardar la dumonda 16) Tut tenor cumprovar eventualas contribuziuns gia approvadas da partenaris, autras instituziuns da promoziun, etc. resp. inditgar tge instituziuns che Vus avais dumandà per ulteriuras contribuziuns da promoziun che n’èn anc betg vegnidas approvadas.

Dumondas tar las annexas

14. Tge infurmaziuns duess cuntegnair il plan da temp e da project?	La detagliaziun da las indicaziuns davart la planisaziun dal project duai correspunder a la grondezza dal project. Per evaluar in project exemplaric duvrain nus dapli infurmaziuns che per in project da pilot u in preproject. Il plan da temp e da project duess mussar tge lavurs ch’èn planisadas en tge spazi da temp, en tge successiun e cun tge resultat. Ideal èsi, sche la survista cuntegna er indicaziuns davart ils custs che sa resultan mintgamai en ils singuls pass. En mintga cas ston esser menziunads ils terms impurtants dal project.
15. Tge infurmaziuns èn necessarias davart l'organisaziun dal project e las cumpetenzas?	Sco en general vala era qua: pli grond ch’è il project e dapli infurmaziuns ch’i dovra per l’evaluaziun. Las indicaziuns duessan mussar tgi ch’è responsabel per tge secturs parzials dal project e tgi che surpiglia tge rolla (gugent ils nums, sche quels èn enconuschents, cura ch’il project vegn inoltrà). Nus savessan ultra da quai gugent tge persunas che stattan davos in project e tge cumpetenzas ch’ellas han. Questas indicaziuns pudais Vus far en differentas modas, p.ex. cun resumar curtamain las experientschas relevantas e/u cun renviar a las infurmaziuns correspundentas en l’internet (p.ex. profil da LinkedIn, pagina-web).
16. Tge infurmaziuns ston resortir dal budget?	En connex cun il preventiv stattan en il center las suandantas dumondas: Quant suandabla è la preschentaziun da las singulas posiziuns en il preventiv? Sa basan ils imports preschentads en la planisaziun da la finanziaziun sin calculaziuns approximativas u datti quittanzas / offertas? Vegn il perventiv manà en urden? Èn las expensas proporziunalas ina cun l’autra? Èn las singulas posiziuns d’expensas documentadas e suandablas? Datti ina tscherta proporziun tranter las differentas posiziuns d’expensas? Per che nus survegnian svelt ina simpla survista dal preventiv da la dumonda, ta supplitgain nus d’emplenir il suandant model: model survista preventiv La detagliaziun da las indicaziuns davart la planisaziun dal project duai correspunder a la grondezza dal project. Per evaluar in project exemplaric duvrain nus dapli infurmaziuns che per in project da pilot u in preproject. Per che nus possian evaluar tut las dumondas a moda cumparegliabla e survegnir in’invista transparenta en il budget dal project, èsi necessari da resguardar ils suandants puncts: Il budget po cuntegnair mo ils custs necessaris per realisar il project. I sto sa tractar da custs d’investiziun u da custs da manaschi per la durada dal project (max. ils emprims 5 onns da manaschi). Las expensas per custs da persunal, custs materials e custs per servetschs externs ston resortir cleramain dal budget. Per projects exemplarics e projects cumplessivs ston ils custs vegnir repartids tenor ils terms impurtants, quai vul dir inditgar las expensas previsiblas per mintga term impurtant. Per projects pitschens, projects da pilot e preprojects n’è quai betg necessari. Ils custs per cuntanscher in term impurtant ston er anc vegnir repartids (i na tanscha betg d’inditgar p.ex. per in pass da lavur ina pauschala da CHF 60’000; igl è necessari d’explitgar
17. En tge autezza èn imputabels max. ils custs da persunal dals purtaders dal project?	Per calcular ils custs da persunal imputabels per collavuraturas e collavuraturs dal project valan las suandantas tariffas bruttas maximalas: manadra/manader da project e sia substituta/ses substitut; cussegliaziuns d’expertas e d’experts CHF 140/h; activitads cun savida spezialisada CHF 100/h; elavuraziun specifica/activitads administrativas CHF 70/h. Sch’ils custs da basa ed auters custs generals vegnan gia finanziads dal Chantun u da la Confederaziun, èsi necessari d’applitgar tariffas pli bassas per ils custs da persunal (guardar la dumonda 18). Custs da persunal èn da budgetar en il project per las persunas involvidas a moda decisiva (purtaders e partenaris dal project). Ils custs da persunal externs che na vegnan betg purtads dals purtaders dal project, ston vegnir integrads tenor las purschidas en la planisaziun da finanzas.
18. Tge infurmaziuns ston resortir dal plan da finanziaziun?	En connex cun la planisaziun da la finanziaziun stattan en il center las suandantas dumondas: Quant realistica è la planisaziun da la finanziaziun? Datti consentiments / garanzias? Datti cifras per ina cumparegliaziun? Èn questas cifras integradas (tariffas / benchmarks / tariffas da calculaziun confurmas al martgà e realisticas)? Èn las posiziuns da retgav proporziunalas ina cun l’autra? È il stadi da la finanziaziun inditgà per posiziun da retgav? (segirà, dumandà ubain avert) En il formular d’inoltraziun stuais Vus inditgar l’import da la dumonda da contribuziun per mauns da GRdigital. En il document «Indicaziuns davart il cuntegn dal project» stuais Vus argumentar l’autezza da l’import. En il plan da finanziaziun èsi necessari da reparter ils imports sin las suandantas posiziuns: atgnas prestaziuns dals purtaders e partenaris dal project (prestaziuns da lavur, prestaziuns materialas, meds finanzials) meds da terzs (meds da promoziun dal maun public, da fundaziuns, donaziuns, etc.) eventuals retgavs dal project (cun vender products e servetschs) ulteriurs meds da promoziun da vart dal chantun Grischun meds da promoziun da GRdigital Per mintga posiziun stuais Vus inditgar il stadi, vul dir inditgar, sche la finanziaziun è garantida, vegn sclerida u è anc averta. Dals custs imputabels tenor il budget po il Chantun conceder ina contribuziun da promoziun maximala da 50% al project. Ulteriuras contribuziuns da promoziun dal Chantun al project vegnan resguardadas per la summa maximala da 50%. I n’exista nagin dretg sin ina finanziaziun da 50% cun ina contribuziun da promoziun da GRdigital.
19. Tge custs èn imputabels per servetschs da terzs a favur dal project?	Servetschs da terzs per il project valan sco servetschs externs. Ils imports effectivs èn imputabels.
20. Tge custs n'èn betg imputabels?	Ils suandants custs n’èn betg imputabels: Custs per lavurs preliminaras n’èn per regla betg imputabels. Igl è pussaivel d’inoltrar ina dumonda per preprojects. Custs da persunal: sche las collavuraturas ed ils collavuraturs da project retschaivan contribuziuns dal Chantun u han in mandat da quel, èsi da garantir ch’il temp da lavur ed ils custs communabels na vegnian betg finanziads dublamain. Per emploiadas ed emploiads dal chantun Grischun na pon vegnir calculads nagins custs da persunal. Custs da basa: custs che concernan l’equipament da basa dals partenaris dal project; spesas, custs materials e custs calculatorics per infrastructura da basa gia existenta dals purtaders e partenaris dal project che ston vegnir finanziads cun autras funtaunas ed èn cuverts cun ils custs da persunal imputabels.
21. A partir da cura èn las prestaziuns imputablas?	Tenor l’artitgel 45 da la Lescha da finanzas dal chantun Grischun èn las prestaziuns imputablas a partir dal mument ch’il chantun Grischun decida da promover il project. Persunas che inoltreschan ina dumonda duain damai calcular temp avunda per elavurar ils documents e silsuenter laschar evaluar els da GRdigital. Nus recumandain da quintar cun 3 fin 6 mais. Dumondas areguard lavurs preliminaras e prestaziuns che ston vegnir finanziadas avant la decisiun da promoziun na pon betg vegnir drizzadas a GRdigital.

Suenter l’inoltraziun da project

22. Co vai vinavant, cura che Vossa dumonda è inoltrada?	En in emprim pass examinescha il secretariat, sche Vossa dumonda è cumpletta ed ademplescha las premissas formalas. Sche quai è il cas, vegnan determinadas almain duas persunas dal cussegl d’expertas e d’experts che evalueschan il cuntegn da la dumonda (per projects pitschens mo ina persuna). A basa da questa examinaziun elavura il secretariat in dossier da project per mauns da la suprastanza da GRdigital inclusiv ina recumandaziun davart l’autezza da la contribuziun. La suprastanza fa en il rom d’ina consideraziun cumplessiva ina recumandaziun da promoziun positiva u negativa da tut ils projects currents e novs per mauns dal Chantun. Davart la promoziun definitiva decida la Regenza dal chantun Grischun en ina disposiziun correspundenta. En cas d’ina decisiun positiva concludan GRdigital ed ils purtaders dal project ina cunvegna da project che cuntegna ils terms impurtants e las modalitads da pajament per l’import da promoziun.
23. Quant ditg dura l'elavuraziun da la dumonda?	Nossa finamira è d’elavurar las dumondas a moda uschè speditiva sco pussaivel, per che Vus vegnias a savair svelt, schebain Voss project vegn sustegnì ed en tge maniera. Per pudair far quai essan nus dependents da survegnir da Vus tut las infurmaziuns necessarias cun l’inoltraziun d’in project. Il secretariat da GRdigital As stat a disposiziun per dumondas ed As accumpogna gia avant l’inoltraziun d’ina dumonda. Cura che las premissas formalas d’ina dumonda èn ademplidas, faschain nus tut il pussaivel per liquidar a moda speditiva il process d’examinaziun fin a la recumandaziun da promoziun per mauns dal Chantun. Tut tenor la dimensiun da la dumonda, la disponibladad da las expertas e dals experts ed autras cundiziuns da basa po quai dentant durar differentamain ditg. Ultra da quai ston ins resguardar che la Regenza decida davart las dumondas.
24. Co vegn jau a savair quant lunsch che mia dumonda è gia progredida?	Il secretariat infurmescha ils purtaders dal project davart l’entrada da la dumonda ed uschia davart il cumenzament dal process d’elavuraziun. Ultra da quai infurmescha il secretariat il mument che GRdigital transmetta vinavant la recumandaziun da promoziun al Chantun.
25. Co vegn jau a savair la decisiun davart mia dumonda?	Vus survegnis ina disposiziun en scrit dal Chantun.
26. Tge vegn fixà en la cunvegna da promoziun?	La cunvegna da promoziun cuntegna al minimum il plan da pajament dals meds da promoziun concedids. Cunquai ch’il pajament per projects pli gronds è collià cun la cundiziun da cuntanscher ils terms impurtants, èn er ils terms impurtants ina part da la cunvegna.
27. Co vegn dà rapport davart il project?	Ils detagls davart ils rapports necessaris ed adequats vegnan sclerids da preschent. Da princip vala: ils purtaders ed il team da collavuraturas e collavuraturs duain pudair sa concentrar sin la lavur da project; ils rapports ed il controlling vegnan elavurads en relaziun cun la grondezza dal project.
28. Tge succeda, sche jau na cuntansch betg ils terms impurtants?	Nus essan conscients che tut ils projects promovids en il rom da GRdigital èn da caracter innovativ. Il process dal project è collià ina giada dapli ed ina giada damain cun intschertezzas e ristgas, ed ils terms impurtants definids a l’entschatta na pon forsa betg vegnir cuntanschids u daventan schizunt obsolets. Da questas circumstanzas tegnain nus quint en l’evaluaziun intermediara dals projects. Ulteriuras infurmaziuns en quest connex suondan proximamain.