«La transformaziun digitala è bler dapli che be l'acquist da cumpetenzas IT.»

Tge vesas ti sco la pli gronda sfida en connex cun la digitalisaziun?

«En il pitschen vesa jau sco la pli gronda sfida da chattar la masura raschunaivla e sensibla. La HFT Grischun ha adina gì in standard da qualitad fitg aut en la scolaziun da manaders en il turissem e marketing. La tentaziun dad utilisar memia bleras metodas d'instrucziun guidadas da la digitalisaziun, che paran finanzialmain attractivas, na fa betg adina senn. Questas schliadan mintgatant la qualitad da l'emprender. En il grond è per mai la dumonda co che nus sco societad vulem garantir l'energia per sustegnair il crescher digital.»

Co affrontais vus a la HFT Grischun questas sfidas?

«Cun ina perspectiva raschunaivla! A partir da quest enviern han nossas studentas e students en lur praticum pliras lecziuns online davart cumpetenzas da marketing digital. Els pon transferir directamain la savida en lur lavur e reflexionar ella ensemen cun ils docents. Grazia a la digitalisaziun è quest transfer en la pratica pli effizient e flexibel. Sper quai vegnan process administrativs simplifitgads enormamain. Tuttina han studentas e students ditg cleramain ch'els prefereschan ed emprendan meglier ensemen en stanza. Relaziuns umanas restan impurtantas, era en in mund digital.»

Tge influenza ha gì la pandemia sin la digitalisaziun en il sectur da furmaziun?

«La pandemia ha accelerà fermamain la digitalisaziun en bleras instituziuns. La curva d'emprender è stada enorma ils ultims onns, era tar nus. Nus savain uss meglier tge che funcziuna e co integrar quai en models d'instrucziun. Per nossa scola cun in curs full-time na fan concepts ibrids betg adina senn, perquai che noss students vegnan per viver, emprender ed experientschar l'Engiadina a moda cumpletta.»

Tge irritescha ti il pli bler vi da la transformaziun digitala?

«Che nus savens na considerain betg las dependenzas sistematicas. Per exempel, tge far cura che la furniziun d'energia croda ora? Co reageschan sistems sco pajaments, access e communicaziun?»

Co prepara la HFT Grischun las studentas ed ils students sin la transformaziun digitala?

«Nus instruein cumpetenzas digitalas relevantas per il turissem ed era abilitads socialas e d'autogestiun. Las studentas ed ils students emprendian da decider raschunaivlamain ed analitgar sfidas, uschia che soluziuns existentas vegnan utilisadas cumprovadamain empè da sviluppar tut da nov.»

Davart Ursula Oehy Bubel

Dapi il 2019 è Ursula Oehy Bubel rectura e dapi il 2009 docenta e manadra da praticums a la Scola auta da turissem dal Grischun, part da l'Academia Engiadina SA a Samedan. Ella ha studegià publicistica ed economia a Turitg ed è mediatura scolada. Sper sia lavur a la HFT Grischun è ella activa en la I-K-T GmbH per sustegnair instituziuns tar il svilup da plans d'instrucziun per scolas autas. Avant lavurava ella per Hotelplan Svizra ed en l’assistenza d’urgenza tar Medicall.