Contribuziun chantunala per in project digital en la branscha turistica
22.02.2024
La Regenza ha concedì ina contribuziun chantunala da maximalmain 130 000 francs a l’Uniun Grischun Vacanzas per realisar il project da pilot «Profil da vacanzas Grischun». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs d’investiziun totals importan 269 494 francs.
La finamira dal project è quella da facilitar als giasts la planisaziun da lur viadis. Tras las datas turisticas dals utilisaders che vegnan rimnadas, pon ils giasts profitar d’ina experientscha persunalisada. Ultra da quai duai il project er crear ina plivalur per las destinaziuns turisticas grischunas e per lur furniturs da prestaziuns. Las datas dals utilisaders vegnan arcunadas – en moda confurma a la protecziun da datas – en in profil da giast per l’entira Svizra, che vegn offrì d’in terz purschider. Questas datas pon er vegnir duvradas ensemen cun funcziuns da persunalisaziun.
En il project da pilot «Profil da vacanzas Grischun» duain vegnir fatgas en in emprim pass las lavurs preparatoricas las pli impurtantas per pudair examinar e validar il project. Sin basa dals resultats furnibels duai vegnir cuntinuà cun in project da realisaziun. Durant la fasa da pilot da 7 mais collavura Grischun Vacanzas cun experts externs. Ils auters partenaris da project sco las destinaziuns, ils parcs grischuns ed ils furniturs da prestaziuns, vegnan integrads en il decurs da las ulteriuras lavurs da project.