gruppa lavur

Influenzar activamain la transfurmaziun digitala

Cun agid da gruppa lavur ans deditgain nus a branschas e tematicas specificas da la transfurmaziun digitala en collavuraziun cun expertas ed experts, persunal dal fatg ed ulteriuras persunas interessadas. Las gruppas da lavur vegnan inizialisadas da GRdigital e manadas u dal secretariat u d’ina commembra u d’in commember dal cussegl spezialisà en il senn d’ina moderaziun neutrala ed independenta. Ellas pon lavurar per ina finamira specifica u servir al barat informal cun ina tscherta branscha resp. tematica. Questa pagina da survista mussa tut las gruppas lavur activas.

Co poss jau participar?

Tut las persunas che vulan contribuir activamain a la transfurmaziun digitala en il Grischun pon participar ad ina da las Think-Tank. Vuls era ti contribuir? Lura ta drizza a la persuna da contact da la gruppa da lavur che t’interessescha. Nus ans legrain sin tai!

Hotellaria e gastronomia

Hotels e restaurants duain svegliar l’attenziun da lur giasts e porscher a quels in eveniment perfetg en tuts reguards. Il medem mument ston els spargnar custs ed augmentar la rendita. Questa gruppa da lavur vul scuvrir problems, analisar quels e preschentar soluziuns pussaivlas dal sectur da la transfurmaziun digitala. Quai fa ella cun valitar trends e discutar pass da la transfurmaziun digitala gia realisads.

Contact: Martin Pally, commember dal cussegl spezialisà da GRdigital (mp@pally.ch)

Plattafurmas da commerzi digitalas

Per il martgà regiunal èn plattafurmas da commerzi digitalas oz in punct da contact indispensabel. En il fratemp datti en il Grischun bleras da questas plattafurmas che lavuran cun in’atgna soluziun tecnica. L’effect da raits po augmentar fermamain il radius da talas plattafurmas. Il basegn da trair a niz sinergias e da profitar in da l’auter è grond. Questa gruppa da lavur porscha la pussaivladad da sa barattar davart l’infrastructura ed il manaschi da las plattafurmas.

Contact: Leonie Liesch, commember dal cussegl spezialisà da GRdigital (leonie.liesch@graubuendenviva.ch)

Cumpetenzas da basa digitalas en il mund da lavur

Questa gruppa da lavur consista d’acturas e d’acturs da la cuntrada da furmaziun dal Grischun e s’occupa dal svilup concepziunal da las cumpetenzas ch’il martgà da lavur pretenda en l’avegnir. La finamira è ina chapientscha communabla per las cumpetenzas da basa digitalas en las differentas branschas. Ina dumonda da promoziun duai vegnir inoltrada a GRdigital.

Contact: Fabio Aresu (fabio.aresu@markenkern.ch)