Projects promovidas
Project digital Campiunadi mundial d’OL 2023
La Regenza ha garantì ina contribuziun chantunala da 105 000 francs a l’uniun «OL WM 2023 Flims Laax» per il project digital «App da cursa d’orientaziun per ils World Orienteering Championships 2023». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. L’entir project è budgetà cun circa 300 000 francs.
Cun il project duai vegnir lantschada ina plattafurma digitala per tut las utilisadras ed ils utilisaders sco er per tut las gruppas en mira en il sectur da las cursas d’orientaziun. L’app da cursa d’orientaziun è vegnida sviluppada en connex cun ils campiunadis mundials da cursa d’orientaziun 2023 a Flem Laax (WOC2023). Ella cuntegna in servetsch da resultats, il program d’occurrenzas, infurmaziuns davart las atletas ed ils atlets, ina interfatscha da social media, recumandaziuns logisticas sco er infurmaziuns e novitads davart l’occurrenza. Concretamain vegnan publitgadas en l’app infurmaziuns specificas per las differentas concurrenzas dals WOC2023, sco in livestream, resultats en directa, in livetracking da GPS, purtrets da las atletas e dals atlets sco er maletgs da webcams da la regiun. Cun agid dal profil d’utilisaziun duai plinavant vegnir purschì in bigliet d’entrada digital per tscherts secturs da l’occurrenza.
Ultra da quai duai l’applicaziun star a disposiziun e vegnir administrada er suenter ils WOC2023 sco portal d’access per il sport da cursa d’orientaziun en Svizra. Per quest intent duai il project digital vegnir surdà suenter ils campiunadis mundials a la Federaziun svizra da cursa d’orientaziun (Swiss Orienteering). Per il final da la cuppa mundiala da cursa d’orientaziun 2022 a Tavau Claustra (1.fin 3 d’october 2022) è l’app gia vegnida lantschada. Suenter vegn ella sviluppada vinavant fin al campiunadi mundial.
Las infurmaziuns las pli impurtantas en in’egliada
- Petenta/petent: Verein OL WM 2023 Flims Laax
- Indicaziuns da contact: Lukas Erne (lukas.erne@woc2023.ch)
- Approvà dal Chantun pls: 15. September 2022
- Cuts dal project total: CHF 300’000
- Contribuziun da promozione: CHF 105’000
Documents
Ils documents ch’il project metta a disposiziun per l’ulteriur diever vegnan archivads qua.
Infurmaziuns supplementaras
Has anc damondas? Nus essan gugent qua per tai! Scriva simplamain a nus: info@grdigital.digital - nus ans legrain da tadlar da tai e d'assistarti!