Communicaziuns 04.04.2024
Contribuziun chantunala a favur d’in project digital per sustegnair la planisaziun d’implants fotovoltaics alpins sin surfatschas libras
La ZENDRA SA è ina joint venture grischuna che sa cumpona da la REECH SA e da la X STATIK SA. En il rom da quest project ha ella l’intenziun da sviluppar – ensemen cun la INFRADIGITAL SA sco «consorzi per implants fotovoltaics alpins» – metodas, instruments e software per sustegnair la planisaziun, l’acquisiziun, la producziun, la montascha, la fabricaziun, il metter en funcziun ed il manaschi d’implants alpins sin surfatschas libras. En il center vegn a star in schumellin digital che sustegna tut ils process da la chadaina da valurisaziun. Cun in uschenumnà «minimum viable product» (MVP) vegnan cumpigliadas las fasas da la planisaziun fin e cun la construcziun. Las enconuschientschas dal MVP duain vegnir integradas en in project successiv, che resguarda er ils ulteriurs process da la chadaina da valurisaziun. La construcziun d’implants fotovoltaics alpins sin surfatschas libras e lur process da fabricaziun èn da princip insatge nov. Il curt temp da construcziun pretenda metodas da fabricaziun e da planisaziun da l’industria (just in time, JIT) che duain vegnir applitgadas en la construcziun bassa speziala.
Il proceder cuntegna perspectivas tecnicas per l’avegnir e po vegnir integrà en projects currents dal «Solarexpress» en il Grischun. En vista a la topografia ed a las relaziuns specificas dal chantun èsi raschunaivel da sviluppar cumpetenzas e schumellins digitals.
Contact per dumondas:
Marcel Meyer
gestiunari GRdigital
T +41 81 250 69 11
marcel@grdigital.digital