Promoziun da la transfurmaziun digitala –  La Regenza introducescha limitas dals custs per las contribuziuns

Da nov duain vegnir promovids be pli projects che cuntanschan ina tscherta grondezza. Quai vul dir ch’ils projects ston preschentar custs imputabels d’almain 100 000 francs. Per projects da pilot/projects preliminars, per studis e per projects da scolaziun e da furmaziun supplementara vala ina limita da 50 000 francs. Uschia importan las contribuziuns da promoziun, che partan d’ina media da la contribuziun da promoziun da 30 fin 40 pertschient dals custs imputabels, mintgamai passa 30 000 respectivamain 15 000 francs.

Questas limitas dals custs duain focussar, augmentar la promoziun e cuntanscher dapli effizienza. Il pajament da bleras contribuziuns pitschnas na correspunda betg al senn ed a l’intent da la lescha per promover la transfurmaziun digitala. Projects pli gronds cuntanschan tendenzialmain in’effizienza pli gronda sin las regiuns ed il chantun. A medem temp ha la pratica mussà ch’ ils custs – tant da vart da las petentas e dals petents sco er da vart da GRdigital e dal chantun – èn memia gronds en cumparegliaziun cun l’ effect d’ ina promoziun cun contribuziuns pitschnas. Cun fixar limitas minimalas vegnan ultra da quai er stgaffidas relaziuns cleras per las petentas e per ils petents.

Per incumbensa dal chantun surpiglia l’ uniun GRdigital differentas incumbensas per promover la transfurmaziun digitala en il Grischun ed accumpogna las petentas ed ils petents, examinescha las dumondas e dat ina recumandaziun da promoziun. Mintgamai la regenza decida definitivamain davart ina promoziun.