Contribuziun chantunala per in project digital per cursas d’orientaziun
15.09.2022
A las duas interpresas Inside Labs SA da Laax e Spot Werbung Pircher Cantoni SA da San Murezzan garantescha la Regenza ina contribuziun chantunala da maximalmain 970 000 francs per lur project digital cuminaivel «Software per ecosistems digitals – dal Grischun per il turissem». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Il project è budgetà cun circa 3,23 milliuns francs.
Las duas interpresas da digitalisaziun Inside Labs e Spot Werbung s’occupan dapi onns da grondas destinaziuns sco Engiadina San Murezzan, Flem Laax, Tavau Claustra u Arosa Lai. Cun ina nova soluziun da software ch’è accessibla per tut las destinaziuns turisticas grischunas duain vegnir furnids en l’avegnir ils dretgs products il dretg mument als dretgs giasts. L’applicaziun scalabla creescha uschia in ecosistem per l’interacziun da las destinaziuns cun ils furniturs da prestaziun e cun lur giasts. A las destinaziuns turisticas manca oz la dretga schelta da tools per pudair crear aventuras digitalas per lur giasts ed uschia generar avantatgs da concurrenza per sasezzas e per ils furniturs da prestaziun da la destinaziun. Pervia da quai perdan las destinaziuns actualmain blera clientella ad interpresas ch’èn activas sin plaun internaziunal.
A tut las regiuns turisticas dal chantun dat il project la pussaivladad da realisar pli svelt la transfurmaziun digitala. Pervia da la structura dal project restan la valurisaziun e las datas registradas plitost en il Grischun ed en Svizra. La colliaziun directa cun la clientella vegn uschia recuperada ed il turissem grischun po restar cumpetitiv a lunga vista.
Contact per dumondas:
Marcel Meyer
mainafatschenta GRdigital
t +41 81 250 69 11
marcel@grdigital.digital
GRdigital infurmescha: dumondas da promoziun ed actualitads
En il fratemp ha il Chantun publitgà las trais emprimas dumondas che vegnan promovidas. Gugent envidain nus a l’occurrenza «GRdigital informiert» en il Caffè B12 a Cuira per preschentar da radent ils projects promovids. A l’apero che suonda datti pussaivladads interessantas per sa barattar e discutar cun la direcziun da l’uniun e cun petentas e petents.