Pront per la transfurmaziun digitala en il Grischun
20.05.2022
Glindesdi, ils 9 da matg ha gì lieu a l’iBW Cuira nossa radunanza generala. Igl è vegnì rapportà bler davart las lavurs da svilup da l’onn da gestiun passà. Suenter la part uffiziala ha l’interprendider giuven Amin Casutt fatg in referat davart materias primas e persistenza e co che la digitalisaziun po contribuir sia part. Cun in apero en legra cumpagnia è la saira ida a fin. Var 60 commembras e commembers èn stads preschents a questa partenza reussida en il nov onn da gestiun.
Cusseglier guvernativ Marcus Caduff ha fatg il bainvegni ed accentuà l’impurtanza da GRdigital per la transfurmaziun digitala en il Grischun. Suenter ha il president da la suprastanza Jon Erni preschentà tge che l’uniun ha cuntanschì en ses emprim onn. I sa tracta en emprima lingia da blera lavur da concepziun e da svilup che la suprastanza ha fatg. En il center èn stads l’entir process d’inoltrar dumondas, ils criteris da promoziun correspundents e la fundaziun d’in cussegl spezialisà. Per finir han ins pudì prender en funcziun l’entschatta dal 2022 il secretariat operativ sut la direcziun da Marcel Meyer.
Good Governance e cumenzament da las activitads regularas
Cun la suttascripziun da la cunvegna da prestaziun ordinaria cun il Chantun e la deliberaziun dal reglament da Good Governance a la radunanza generala dals 9 da matg 2022 po l’uniun ussa cumenzar ses manaschi operativ regular. Cun las directivas da Good Governance garantescha la suprastanza dad ademplir sias incumbensas a moda faira, transparenta ed objectiva, da manar l’uniun independentamain d’interess persunals e da mantegnair l’integritad e la vardaivladad da GRdigital sco organisaziun spezialisada tenor l’art art. 5 da la Lescha davart la transfurmaziun digitala en il Grischun.
GRdigital è ussa pront per prender per mauns la transfurmaziun digitala. Per l’onn 2022 han prioritad las suandantas finamiras:
- GRdigital vegn percepì sco post da consultaziun e da coordinaziun cumpetent per temas da la transfurmaziun digitala.
- Differents novs projects da la transfurmaziun digitala sa sviluppan cun agid da las raits da GRdigital.
- Emprims projects ch’èn vegnids inoltrads a GRdigital vegnan realisads.
- Il Chantun paja las emprimas contribuziuns da promoziun sin fundament da las recumandaziuns da promoziun positivas da GRdigital.
- Il cussegl spezialisà survegn novas commembras e novs commembers e daventa ina rait spezialisada da pli auta qualitad en il sectur da la transfurmaziun digitala.
Bainvegni en la suprastanza, Aixa!
La suprastanza actuala è vegnida constituida ils 10-05-21. En sia cumposiziun tegna ella quint da la diversitad cun resguardar criteris da vegliadetgna, schlattaina, cultura e biografia professiunala. Cun la tscherna da Aixa Andreetta è la suprastanza vegnida cumplettada cun ina represchentanta cumpetenta represchentant cumpetent da las regiuns italofonas.
Ulteriuras infurmaziuns